Լրացուցիչ կրթության կազմակերպման կարգ

Հաստատվել է կրթահամալիրի կառավարման խորհրդի 29.08.2024թ. նիստին

Սովորողի լրացուցիչ կրթությունը (այսուհետ` լրացուցիչ կրթություն) «Մխիթար Սեբաստացի» կրթահամալիրում իրականացվող հեղինակային կրթական ծրագրի բաղկացուցիչն է։ Այն որոշված է կրթահամալիրի կանոնադրությամբ, կրթական ծրագրերի ուսումնական պլաններով, «Նորարարական մանկավարժության ծրագրերի իրականացում հանրակրթությունում» պետական դրամաշնորհային ծրագրով, սովորողների անհատական ուսումնական պլաններով, ուղղված է տարատարիք սովորողների նախասիրությունների զարգացմանը և կրթական պահանջները բավարարելուն: Լրացուցիչ կրթությունն իրականացվում է խմբային  և  անհատական  ուսումնական պարապմունքների, ուսումնական նախագծերի, ուսումնական ճամբարների, հավաքների միջոցով:

Սովորողների լրացուցիչ կրթությունը կազմակերպելու համար կրթահամալիրի կազմում գործում են լրացուցիչ կրթական ծառայություններ իրականացնող հաստատություններ՝ ուսումնական կենտրոններ, լաբորատորիաների, արվեստանոցների, արհեստանոցների, ուսումնաարտադրական արհեստանոցների  ցանցը։  Կրթահամալիրում լրացուցիչ կրթական ծառայություն կարող են ստանալ ինչպես դպրոցահասակները, այնպես էլ մեծահասակները:

Կրթահամալիրում գործող ուսումնական կենտրոնները

Կրթահամալիրում գործող ուսումնաարտադրական արհեստանոցները

• Մետաղապլաստի
• Բուսաբուծության
• Գինեգործության և սպիրտի թորման
• Կարի և մոդելավորման
• Արտադրական դիզայնի
• Ատաղձագործական
• Հացաթխման
• Մառան
• Ինժեներական
• Սարքաշինական
• ՏՏ, ռոբոտաշինության
• Քանդակի
• Մետաղաձուլական
• Մետաղի և քարի գեղարվեստական մշակման
• Խեցեգործության

Լրացուցիչ կրթության յուրաքանչյուր կենտրոն ունի իր բլոգը (կայքը), որտեղ թվարկված են տվյալ կենտրոնում մատուցվող ծառայությունները և վճարները, դրանց նկարագրությունները, պարապողները, պայմանագրի ձև, ուսումնական նյութեր: Լրացուցիչ կրթություն իրականացնող մանկավարժական աշխատողն իր ուսումնական բլոգում ունի համապատասխան բաժին, որում հրապարակված են իրականացվող ծրագիրը, ուսումնական նյութերը, սովորողների ցուցակը։

Սովորողների երկարացված օրվա կազմակերպումը լրացուցիչ կրթություն է, որ իրականացնում են կրթահամալիրի ուսումնական մասնաճյուղ հաստատությունները։ Մասնաճյուղի կայքում կա «Լրացուցիչ կրթություն» բաժին, որը ներկայացնում է տվյալ մասնաճյուղում իրականացվող լրացուցիչ կրթության ծրագրերը, պարապմունքների դասացուցակը, սովորողների ցուցակները:

Ուսումնական օրացուցով որոշված ամենամսյա առարկայական ֆլեշմոբները լրացուցիչ կրթություն են, որոնց սովորողը կարող է մասնակցել ընտանիքի անդամների հետ կամ մենակ։ Ֆլեշմոբը բաց է (կարող է մասնակցել ցանկացած մարդ): Ֆլեշմոբի առաջադրանքների կազմումը, ստուգումը լրացուցիչ աշխատանք է, որը համակարգում են մասնախմբերը։  Առաջադրանքները կազմվում են ըստ մակարդակների՝ առաջադրված խնդիրների բարդության: Առաջադրանքները հրապարակվում են մասնախմբերի բլոգներում, կայքում։ Մասնակիցն ընտրում է իրեն հասանելի մակարդակը՝ անկախ իր դասարանից կամ տարիքից։ Ֆլեշմոբի պատասխանատուները սահմանված ժամեկետներում հրարապակում են ֆլեշմոբի մասնակիցների ցուցակներ, արդյունքները։ Ֆլեշմոբի արդյունքները կարող են քննարվել նաև ուսումնական պարապմունքների ժամանակ։

Լրացուցիչ կրթություն կազմակերպվում է նաև կրթահամալիրի ուսումնական օրացույցով որոշված ճամբարներում՝ ամառային լողափնյա, հայրենագիտական-բնապահպանական-արշավախմբային, կրթական փոխանակումների ծրագրով, կրթահամալիրի սովորողի, աշխատողի ընդունելության կարգերով որոշված «Մուտք կրթահամալիր» և այլ։

Սովորողը լրացուցիչ կրթություն կարող է ստանալ նաև տնային առաջադրանքների, արձակուրդային ուսումնական նախագծերի միջոցով:

Կրթահամալիրի մանկավարժական աշխատողը կարող է իրականացնել լրացուցիչ կրթություն՝ սահմանված կարգով ներկայացնելով իր ուսումնական բլոգում իր առաջարկած ծրագիրը, աշխատակարգը (պարապմունքների շաբաթական թիվ, ժամանակացույց), շահառուներին, ուսումնական նյութերը:

Կրթահամալիրի սովորողն իր լրացուցիչ կրթությունը կարող է կազմակերպել կրթահամալիրից դուրս: Նա իր բլոգում պարբերաբար պատմում է իր լրացուցիչ կրթության, հաջողությունների մասին:

Լրացուցիչ կրթության պարապմունքները, արդյունքները սահմանված կարգով արտացոլվում են կրթահամալիրի էլեկտրոնային մատենավարության մեջ։

Լրացուցիչ կրթությունը կազմակերպվում է.

• լրացուցիչ կրթական ծառայությունների համար սահմանված կարգով կնքվող ուսումնառության պայմանագրերով և դրանց հավելվածներով որոշված ծնողական դրամական միջոցներով. վճարի չափը որոշվում է կրթահամալիրի խորհրդի հասատատած` ուսումնական գործունեության մեջ ներառված աշխատողի հիմնական աշխատավարձը ձևավորող միասնական ցուցանիշներով.
• կրթահամալիրում իրականացվող «Նորարարական մանկավարժական ծրագրերի իրականացում հանրակրթությունում» ծրագրի միջոցներով.
•  նախաձեռնողների կամավորական աշխատանքով.
• այլ շահառուների, ծնողների, բարերարների, միջազգային ծրագրերի նպատակային ներդրումով։

Վճարովի լրացուցիչ պարապմունքների մասնակցությունը կամավոր է: Լրացուցիչ պարապմունքների խմբերը բաց են. կարող են ընդգրկվել այլ դպրոցների սովորողներ` սահմանված կարգով կնքելով պայմանագիր:

Սովորողը կարող է կրթահամալիրի ուսումնական կենտրոնում, արվեստանոց-արհեստանոց-լաբորատորիայում իրականացնել լրացուցիչ կրթության իր անհատական նախագիծը՝ համաձայնեցնելով իր աշխատանքը դրա ղեկավարի հետ, ըստ տարածքի զբաղվածության, աշխատակարգի։  

«Հանրակրթության մասին ՀՀ օրենքով. «հանրակրթություն` անձի ուսուցման և դաստիարակության գործընթաց, որն իրականացվում է նախադպրոցական, տարրական, հիմնական, միջնակարգ կրթության հիմնական և լրացուցիչ ծրագրերով» (հոդված 3.1.1), «հանրակրթական ծրագիր (հիմնական և լրացուցիչ)` առարկայական ծրագրերի, ուսումնական պլանների և ուսուցման կազմակերպման ձևերի ամբողջություն, որոնք ապահովում են հանրակրթության պետական չափորոշիչով սահմանված վերջնարդյունքներն ու կարողունակությունները» (հոդված 3.1.6), «Հանրակրթական լրացուցիչ ծրագրերը նպատակաուղղված են հիմնական ծրագրերից դուրս սովորողների նախասիրությունների և կրթական պահանջմունքների բավարարմանը: Հանրակրթական լրացուցիչ ծրագիր կարող է իրականացնել ուսումնական հաստատությունը կամ այլ կազմակերպություն` համաձայն իր կանոնադրության» (հոդված 7.2), «Հանրակրթական հիմնական ծրագրերը, որպես անբաժանելի մաս, կարող են ներառել` 1) ուսումնական հաստատության կողմից իրականացվող ուսումնամեթոդական, փորձարարական, հետազոտական աշխատանքները. 2) մանկավարժական աշխատողների մասնագիտական կատարելագործման միջոցառումները. 3) սովորողների համար հանրակրթական լրացուցիչ դասընթացների կազմակերպումը. 4) սովորողների առողջության պահպանման միջոցառումները. 5) սովորողների սննդի կազմակերպումը. 6) սովորողների տրանսպորտային կազմակերպված փոխադրումները. 7) սովորողների երկարօրյա ուսուցման և (կամ) գիշերակացի կազմակերպումը. 8) ուսումնաարտադրական բազաներում, մարզաառողջարարական ճամբարներում սովորողների ուսուցման, դաստիարակության ու հանգստի կազմակերպումը» (հոդված 7.10)։